2 Peter 2
Ta Mitema sou Ilosieixa'a Lavulavu Kalakalavoi
1 aIa, tatei la ta mitema sou palomatana kalakalavoi mixolu no taine'i ta Isilaeli. La sou anu iouvilesisi aloxo ta mitema sou ilosinge lavulavu kalakalavoi kalumo ixolu no taingengi. Ane'i itoke i'una la ilosiengi lavulavu kalakalavoi la ixovulaulaulinenge mo ngapolo vaaxu. La ane'i mixiunu tumali'a noxou Tila noxi'a e mulotone'i milivu. Ane'i mi'oxonu aloxo ne, ia sexasisi sou iuluamulinu. 2No anu kalakalavoi noxi'a ne, la ta mitema tavu'alo imulinu 'ilixo masumasua no anu masaxa masumasua sou vasime'a sou imaela no anu, la sou u'oxone'i ta mitema la ivikala masumasua no anu vote'i manina sou. 3Xo no anu masaxa noxi'a ta mitema sou ilosinge lavulavu kalakalavoi ne iisuxu mimii tavu'alo la i'oxo vaivaikala kalakalavoi mose'i no anu xavutalai'asi sou i'oxo lolongenge la ino'u lamolimengi. Xo Lataua e Anu utulusi'a no anu vaivaikala mo u'oxo masuane'i muloo tatei mo sou ukalusi'a ne uai uasi anu 'a uxoxolu.4 bXe ngingi ngelavusou lexe ta angelo mi'oxonu susu la Lataua utatalosi'a uasi, ia mupeine'i mulu'elai no taxa e isivoxo toxoxa'a mo tuala sou navunavu sou ixomaiou voxo sou itulu no anu vaivaikala. 5 cXo ta mitema tatei mi'oxo susu la Anu utatalosi'a uasi, Anu mu'oxonu alipaa toxoxa'a la mukalusi'a ta mitema e imulinu 'ili'ilixo noxou Lataua uasi. Ia Anu musaxila'u Noa anusisi itema sou a'alo no anu 'ili'ilixo mulapu noxou Lataua ilo'a ta mitema muxatele ta tameisi mimauli. 6 dMo anu mu'oxonu masuanu sou mu'elaxu tuala tatila tamei ne Sodomu xe ne Xomola la muxali lomulosi. Anu mu'oxonu aloxo ne sou mumaxa'u mii ma'ia ane sou uxali ili'i no 'a maulixa'a ta mitema e imulinu 'ili'ilixo lailaixe noxou Lataua uasi. 7 eMo Loti anusisi Lataua mu'umenu xo anu muxolu no taine'i ta mitema e i'oxonu 'ili'ilixo masumasua manina. No voxovoxo utotomu la anu mulolomusi'a xe mumaisi'a mi'oxo'oxonu 'ili'ilixo ne la tanu mutamasi'a manina, xo ane'i imulinu 'ilixo mulapu uasi. 9Anu aloxo ne la sou ta mitema e imulimulinu 'ili'ilixo lailaixe noxou Lataua, tovotovo uxalisi'a la Tila mulavusou vote'i anevaa sou u'umene'i, la usolonu sou ulosi'a navunavu ane'i ane imulinu 'ili'ilixo mulapu uasi ulai utalo no voxo ane sou ane'i itulu no anu vaivaikala. 10 fMii ane 'o ne uxali manina noxi'a ane'i ane xavutalai'a uavuti sou imulinu masaxa masua sou vasime'a la mixiu tumaliau vaikala noxi'a ta tatilasi'a. Ta mitema ne mi'oxonu tilasi'a la i'ume uasi la mivikala masua noxi'a ane'i ane ta lailaixe ixoxolu teitexi. 11 gLa sou ane'i ta angelo e ixoxolu teitexi ne xavine'i musuku muaulixa'a ta mitema ne, ia ilavusou i'otosou anaxa'a no iou Tila uasi. 12 hXo ta mitema ne ane'i aloxo ta mimii e Lataua mukoine'i mixolu no lia 'o imulimulinu masaxa sou vasime'asi, ia ilavusou ixavutala uasi mo ane'i loxo ta mimii e mixali mixolu no lia 'o sou ta mitema ive'ave'a la isoisolisi. Ia ta mitema ne ivikala masua no anu mii ma'ia e ane'i ilavusou uasi. Ane'i iulua kalumo aloxo ta mimii e Lataua mukoine'i.
13Ane'i ino'u lakolisou navunavu ma'ia ane ane'i mi'oxonu mulai noxi'a ta mitema. Mo ane'i ixavutala lexe no anu 'ilixo sou ngingi ngongi'a nga'ani ngapita la anu mauli ane. Ane'i i'oxonu mimii no aso uieiei sou umomomo sou masaxa sou vasime'a, xe ane'i i'oxonu aloxo ne la imaa nunisinge mo ipamaelangengi no anu 'ilixo masumasua noxi'a. 14Ane'i masaxa lexe imuline'i ta sema sou vote'isi mo masaxa tatila noxi'a sou i'oxonu 'ili'ilixo sou vote'i ia i'oxonu aloxo ne la ukalusou masaxa noxi'a uasi, sisixa'a sio. Mo ane'i ilapune'i ta mitema e xavutalai'a pekia'u uasi la i'oxonu 'ili'ilixo ne kalumo. Mo ane'i milavu manina no anu 'ilixo sou isuisu. Ane'i mi'oxonu aloxo ne la ane'i mixolu no laaxu tu'utu'umaxu noxou Lataua. 15 iAne'i mi'oxonu aloxo ne, la imulinu vote'i noxou laixe uasi mipolopepeenu mo milai va'axu, mimulinu vote'i noxou Balamu anu Beori 'olu. Anu mumasaxau lamoli la mu'oxonu susu. 16 jIa Lataua la'iaxu xo anu mu'oxonu susu sou umasaxau lamoli noxou tatananu tuala la sou donki anu mii vile ulavusou uvivikala uasi ne, muxiunu xolinu loxo itema mo mutaluxu xavutala noxou itema sou palomatana ne no anu susu noxou.
17 kTa mitema ne ane'i aloxo pupulu e lexa no anu uasi mo aloxo tamuxalaxu uali e la'avexu uali une'e la utavulenu ulai. Ane'i ta mitema ne Lataua mulalaxiinu tualasi'a sou ilai ixolu no anu ne isivoxo manina mo kaluxu uasi. 18Ane'i ipulipulinu anaxa'a vitanisi mo itooxa'a no anu susu noxi'a ne. Mo i'oxonu 'ilixo masua no anu masaxa masua sou vasime'a sou itovo ilapune'i ta mitema ane itovo i'ume noxi'a ta mitema e imulimulinu vote'i mukilikalu ne. 19Mo ane'i ivikalane'i ta mitema lexe imuline'i la ane'i ilulusi'a, ia ane'i ta mitema ne susu musakisakine'i la ilulu uasi. Ane'i mixali loxo itema sou xaixai vitanisi, xo loxo itema vile umulaxu mii vile uuli no anu maulixu la anu uxali loxo itema sou ipalupalusou no anu mii ne. 20 lXo no anu lavulavu noxi'a noxou Tila noxinge mo itema sou pamauli Iesu Kalisito, la ta mitema mi'ume no anu 'ili'ilixo masumasua noxi'a ta mitema e sou i'oxonu masuane'i. Xe ili'i la ane'i milivuu 'ili'ilixo ne la mixali masua avile, xo tei la anu masua ia ane 'o la anu masua a vile. 21 mLa sou anu laixe lexe mamu sou ane'i ino'u lavulavu no anu vote'i sou 'ilixo mulapu ne. Xo ane'i milavusou xe mukalu la mixiunu tumali'a no anu lapuloto noxou Lataua e Anu molu mulosie'ixu. 22 nLa sou ane'i mi'oxonu aloxo ne la anu mumomomo sou vaikala vile sou peletotosinge aloxo 'o, “A'aa uexi xe ukalu la ulivu ulai u'ou la.” Mo aloxo, “Memee u'ulo no lexa xe ukalu la ulai umalinga no pita la.”
Copyright information for
ATA